حياة

 صوت موزيكا حزينة ضربات بيانو و كاس في يدي و نغزر للقمرة تذكرت برشا حاجات منهم الباهي و منهم الحزين شو بديت نغطس في روحي ليا برشا ما حكيتش مع روحي و ليا برشا ما بقيتش وحدي و ما قعدتش مع روحي تنهدت وسكتت و قلت في سري انا اللي بكيت وحدي و عندي الف سبب و سبب انا اللي عطيت برشا و ما خذيت شي ، انا اللي لوجت على الفرحة في حاجات تافهة علخر و شي ما لقيتش ، انا اللي خذات مني الدنيا العزيز و الغالي و ما خفتش و ما خفتش لا كبشت فيها بظوافري لين الدم سال لين التعب تعب مني لين كل شي ولى بارد كيما قلبي لا انا ما كنتش هكا انا نضجت من كدس التجارب اللي عشتها نكتب و يدي بكلها نار نار وجيعة تشعل ، تحرق ، كان جا عبد آخر عاش اللي عشتو راو ميت من سنين و حتا من هاك الشاهد اللي على قبرو راو تكسر لهفة نحس فيها على دنيا لتوا ما خذيت منها شي اما عندي ثقة في ربي اللي باش تكون ليا و باش نعيش حاجات كيما انا نحبهم غير شوية وقت الصعيب اللي ما نجمتوش فات فسخت اغلا عبد عليا من مخي ، فسخت احلا حاجة عشتها و كملت صحیح صعيبة ندمت تعبت تعبت و لتوا تاعب اما و حق الرب عادي كل شي يفوت خاطر اقتنعت و عرفت اللي مش كل شي نحبوه يلزمنا ناخذوه ساعات نحبو عبد باش يكونلنا درس ، درس الحياة باش نعرفو اللي العزيز مشا ما فماش ندم على الرخيص ، حتا من كل اللي صار مازال فما حب في القلب الله غالب قلبي مش ملكي مش متاعي ترهن و ما عنديش حق رهنية ترهن من هاك النهار تعرف لون دمي الاحمر حبك انتي اما مخي طغا عليا حكا عليا قاللي لا وقوف على الاطلال لازم تكمل و هذا كاس اخر ليا و ليك 🖤🖤